بـــــائعة الاحـــــلام

بــــــــــــــــــائعة الاحـــــــــــــــــــــلام
*****************
لو عايز تشترى أحلام ... تعالى عندى

وأعرفك بالعنوان
عنوانى ميدان الحب شارع الوفاء..
متفرع من شارع الحنان
على ناصيته حتلاقى بائع الهوى وبائع الأوهام
حتلاقى بيت كبير اسمه بيت السعادة والحرمان
حتلاقينى ساكنة فى أعلى دور وبابى مكتوب عليه بائعة الأحلام
أطرق بابى حتلاقينى منتظراك
ومعايا أحلام ياما
على كل شكل ولون حتسعدك..حتبهرك..
حتعيش فى ملكوت
شوف نفسك فى أبة
وقول لى عليه!!
معايا أحلام...
تخليك عايش فى زمان غير الزمان
ومع ناس غير الناس
تلاقى فيهم كل اللى تتمناه
من حب وغرام وهيام.
وتعيش وسطهم كأنك سلطان
الزمان والمكان
معايا كمان أحلام...

تخليك تسيطر على الكون دة كله
والناس لك عبيد وخدام
كمان معايا أحلام...

تبدلك ليلك بالنهار
وتجعل طريقك الصعب جنة مفتوحة تجرى فيها
من غير جنود ولا حراس
معايا كمان أحلام...

تقلب الصخور والجبال
لأجمل ما أبدع الرحمن
حتلاقى فيها البساتين
مليانه بورود.. وزهور.. وريحان
حتلاقى فيها الأشجار خضراء والعصافير تتراقص وتشدو
بأصوات سيمفونية عذبة الالحان
وأخر ما عندى من أحلام...
أحلام تخلى الحبيب البعيد منك قريب
وان كنت بتعانى من جفاه
تلقاه مغرم وهيمان.. ومتيم بك
وعايش يفكر فيك وقلبه مشغول بك
ولوعة بعادك يقاسيها فى أسى وتنهيد
قول لى...
عايز أبيع لك ايه من أحلامى...؟؟
عارفة عينيك بتسأل الف سؤال وسؤال!!!
عايز تسألنى...
أنا عملت اية بالأحلام...؟؟
بلاش أنا... علشان أحلامى كلها
ضاعت فى الهوى
ومشوفتش فيها يوم هنا
عشت أحلم وأحلم
ملقيتش غير سراب وهوان وأسى.
من بعدها حرمت أشترى الأحلام
لكن ببيعها انتقاما منى للزمن
ياريت انت كمان
بلاش تشترى الأحلام
ارض بالمقسوم
علشان متشوفش الهوان
وتعيش حياتك فى الاسى!!